自私人渣!

今日發生一件令我火滾o既事!

今日放工o個陣落好大雨,廣州例牌塞車.去到坐巴士o既地方差唔多7點.巴士7點05分到,上齊客跟住開車.架車開o左冇幾耐就有把女人聲同個司機講o野,雖然我唔係聽得好清楚.但係知道佢同個司機講:去中途站條路好擠塞建議直接行高速公路唔好去中途站接客.我聽到之後立即o係後面鬧佢,平時我係唔會咁做.不過我覺得o的人好自私!架車仲未坐滿,起碼可以坐多4個人.外面落緊好大雨,人人都想快o的返屋企.你上o左車你就緊係舒服啦,但係中途站應該好多人等車喎.如果唔去接佢o地,咁佢o地要等幾耐呀?!如果調轉係你o係中途站等緊車你o既感受會點呀?!如果俾你知道因為有人怕塞車唔接你,你肯定講哂粗口問候全世界,然後打電話去投訴!

當o的人收集高速公路路費,我冇俾佢.因為我唔贊成!巴士到站冇耐有另外一架巴士到站,上面企滿哂人.唔知o個班自私鬼見到之後會唔會有感受?

哈!'五星級的家'住o左o的五星級o既自私人渣!

無名火起

o尋日因為心急想返去睇o下個仔,所以一過皇崗立即上祈福新村巴士.(因為返屋企o既巴士要等多9個字先到.)一到站上o左o架的士,個司機開價50大洋.(獅子開口!)即刻落車搭另外一架.按咪錶計,返到屋企40大洋.見到阿仔生生猛猛,個心都安落o的.o尋日我件行李特別重,返到屋企覺得好 支力.到o左夜晚要 目訓o既時候,阿仔唔知做乜不停LiLi LaLa不停咁講o野.o尋晚又熱喎,o岩o岩 目訓著o左又俾佢嘈醒連續幾次.搞到12點半都仲唔肯 目訓,最後仲'mit'我添,我即時無名火起打o左佢手仔兩下.佢即刻喊,收聲之後冇耐佢又玩過,最後老婆建議我去隔離間房 目訓.終於大家都有覺 目訓,今朝起身我問老婆 目訓得好唔好,佢話佢冇乜點 目訓過.唉~~~!老婆,妳真係辛苦啊!

一家大細都病哂!

已經係第二次成家一齊病喇,我同基基差唔多一齊起感冒.我呢幾日已經好返o的喇,(如果冇人裝香,我仲好得快o的添呀!)基基日日都差唔多,好在冇發燒!今日老婆同我講佢又有感冒,真係出奇!我o地唔係o係埋一齊都會一齊病?!最弊老婆個證o岩o岩聽日到期,如果唔係佢就會同基基返香港睇醫生......

廣西之行

今次係我第二次去廣西,上個星期五同阿豹成班人飲完茶之後出發去機場.(本來我諗住坐機場巴士去,不過阿豹佢太好人喇!要自己開車送我出機場.)一路上都好順利,點知o係機場高速尾3 o個個出口條汰爆o左,幾經辛苦換o左條士啤汰先知兩條汰都係唔用得.終於要拖車先拖我o地去機場然後先去補汰.我去到機場即刻check-in然後即入閘去到停機坪冇耐就入得閘.真係好險!

今次開會開o左2日,同我同房o既係個煙鬼.佢話我知佢有感冒,但係又不停食煙!好心佢食小兩口啦......

咁多次開會最令我滿意o既係呢間酒店有免費上網,我今次完全都唔覺得太悶.

我個同房冇咩奇怪舉動,不過佢做o左件我好唔鍾意o既事.佢好鍾意點著支煙放o係煙灰缸,然後唔理佢.好似裝香咁.

佢日又裝香,夜又裝香.o岩o岩 目訓醒又裝香!(大佬呀!o岩o岩 目訓醒食乜鬼煙呀?!)

今次都有安排去旅遊,我o地去o左一個岩洞.我咁大個仔都未去個岩洞!入面o的石奇型怪狀,配合o的燈光令我諗起宮崎俊o個套<天空之城>入面其中一幕o既情景....... 正當我好陶醉o個陣身邊又傳o黎一陣煙味.當堂咩興致都冇哂!(有冇搞錯呀?!個導遊咪叫o左唔好o係岩洞裏面食煙o架啦!食完o的煙頭周圍掉,o的人真係好自私呀!)去完旅遊返到酒店覺得好 支力!想話去腳底按摩,點知要30分鐘先有師父.都係算吧啦!

今朝去到機場冇耐,機場宣佈我班機機械故障要delay.(我都預o左你係咁o架喇!)後來班機到o左準時起飛.所以話有時o的delay原因分分鐘係藉口.

終於返o黎喇!

搞o左咁耐終於可以再o係blogger寫blog喇!

為免下次唔知幾時又寫唔到,我幾日前o係xanga開o左個新blog.亦到將bloghk o個邊所有舊blog搬哂去xanga,大家只要click 左邊條link就可以去到o個邊.(兩邊內容會同步更新)


呢幾日去o左廣西南寧,家陣好 支力.....................................