重慶之行

今次個trip真係'興'過'辣雞'!首先係代理商放我o地飛機,搞到我o地要坐4個鐘頭'野雞'巴士去另一個山卡啦地方.(重要係夜晚坐車!)半夜3點去個客度做service,做到5點收工,然後一直昏迷到中午11點.同o的客食飯,吹水.然後又坐返4個鐘頭巴士返重慶,返到去同個縮骨代理商食麻辣火鍋.我同佢o地講返咩情況.(原因係使用不當.)點知佢竟然認為我o地逗留時間太短冇解決到問題!(o個件牛皮燈籠點極唔明!)我俾佢係咁'省',又唔可以還火.唯有谷住度氣嘗試心平氣和解釋俾佢聽要個客按正確方法使用o的產品先可以解決問題.佢先慢慢接受.o個個死縮骨婆,見我唔食o野就同佢老公講話我未解決問題所以冇心機食o野.佢老公重話我掛住老婆同仔先至冇心機.(自作聰明!你係咁'省'我,我點食得落呀?!)好在有穌哥安慰我,如果唔係我都費時o徙氣去點著o個兩個牛皮燈籠.索性一把火燒o左佢算喇!返到o黎要寫返份report俾個客,今日一隻字都未寫聽日開始要搏殺喇 !

請假,執屋

sam記前一排搬走o左,帶走o左一大堆行李,我同老婆諗住就o黎過年不如提早大掃除啦.於是由星期六開始進行大執屋.我o地兩公婆負責執屋,老竇阿媽就幫我o地睇住基基呢個百厭星!我o地總共執o左兩日.最激氣就係辛辛苦苦咁將部電腦搬出廳,但係部腦唔知點解冇o左display!(激氣呀!)而家焗住用部laptop上網.(不過好爽!)今日執到晏晝覺得自己執得太晏,於是同老總請定聽日假(29號).佢問我點解請假?我當時唔知點答佢,咪話俾佢聽屋企有事囉!(唔通同佢講:我要執屋咩?!)雖然佢問我請假o既理由好正常,(掉轉o的友仔請假我都會問佢o地理由啦.)但係我個心覺得有o的顧慮.怕佢諗埋一面.希望我返到去o個陣佢唔好再問咁多就好喇,回想自己o係公司做o左十年.一直都好少請假,通常都係請病假.(感謝主!我身體都好健康,好少病痛.炒車o個鑊另計!)除o左有一年請o左7日去日本玩之外就好少請假.所以我覺得今次請假唔算過份,但係個心重係有少少不安.或者我份人太緊張喇!唔知咁樣屬唔屬於奴性重呢?

又要出trip喇~~~~~~~~~!

過兩日又要去重慶喇,今次主要係去見o下客同o的客傾o下計.因為某個原因我覺得今次個trip好重要.希望事事順利,同埋平平安安啦.

早兩日同大少玩o左3,4轉騎馬仔,俾佢騎完之後成個人散哂!星期四o個日仲成身冇力添,本來星期五要去同太子爺試新配方.但係個人重係好唔舒服所以去唔到,不過聽我同事講試驗結果幾理想.當堂舒服哂!

24又返o黎喇!睇o左4集覺得今個season劇情緊湊o左好多!(期待,期待!)

強力推介

我老死個blog,大家有興趣o既話去坐坐啦.

http://hk.myblog.yahoo.com/monstertong


去搗亂都得o架!

心淡

唉!今日又俾老細丙喇......

佢唔明o既,我又點會明呢.

佢每一次出o左事之後都問點解,我又何嘗唔想知點解?!

老實講如果我事先知道點解會出事,我就唔使咁愁啦.

唔係話你唔丙得我,只不過好多時o的o野都係大家都唔想.

你叫我有乜唔妥要指出o黎,唔好包庇任何人,我真係咁做你埋又係叫我唔好賴人.

對你o黎講手掌又係肉手背又係肉,我篤o左出o黎又可以改變o的乜o野呀?!多一事不如少一事呢鑊我硬食算啦.