又去旺角

終於真係返到喇~~!

今朝同老竇去太子Nokia睇手機,行行見口渴買之可樂ZERO飲.(味道麻麻!我寧願肥都唔再飲佢lu,除非冇得揀啦!)之後部電話去SE服務部修理.放低部機之後行一陣,本來想買4GB手指不過唔捨得.睇錶原來到食晏時間,一路行一路諗想食乜.突然間又'痕痕'想食回肉客飯同鍋貼.於是憑記憶去位於旅行社附近o既一間上海舖.點知見到裡面冇客人,冇燈光,蒸籠冇煙.睇怕係未準備好,所以我冇入去.我附近行一陣,突然我見到佢......

一間我中學時代好鍾意去o既餐廳,見到佢執苙覺得好可惜!讀書陣每日中午我都去呢度食飯.由於自己性格關係,唔識同人相處.所以冇乜朋友,通常都係自己食飯.(我當時做風紀隊長,作風極之死板.)去到度見到都係自己學校o既同學.大家可以試想一下,旺角要食飯有幾難呀?但係成間餐廳都塞滿人就可想而知間餐廳係幾咁受歡迎.我最記得我最鍾意食佢o既香腸牛扒飯,$15連湯連餐茶仲送雪糕添.係咪抵到爛呀?

行程繼續......
我最後都食到回肉客飯同鍋貼,唔......我本身食冇乜要求,同埋唔係咩食家.但係我呢餐食得好開心!我食量唔大,一餐只係食一碗飯.到上菜陣先記起客飯係一兩飯.(死喇,我重叫埋鍋貼添喎.食唔哂點算呀?我唔想呀!)但係我竟然食得哂,重飲哂o的湯!

食飽飽之後行o左一陣街街,去哂想去o既地方.重要等多兩個鐘先有機,於是就去一間漫畫書坊.到又有得上網,又可以睇漫畫,仲可以睇vcd.每個鐘只係$10,好過周街行呀!我睇o左套vcd,上一陣網.點知後面條四眼仔突然鬼殺咁嘈,大大聲講粗口.不停打個keyboard,好似痴咁.破壞哂o的氣氛!唔理你,我走!

完機返屋企,今日真係玩得好開心呀!