生活雜記

工作

自從辭工之後心情一直都好好,好多都睇開.不過都重有煩!唔知點解o的人到而家都重咁依賴我.(好心你爭氣o的啦!我唔幫得你幾耐!)唉~!到我走之後你班友都唔知點呀!交接o既工作未正式開始,原因係公司未正式通告有人事變動.其實我唔明公司點解咁耐唔公布,更唔明我o既繼任人點解咁執著一定要有白紙黑字先肯交接?!(老總已經通知佢會接我個位.)今日係新廠奠基o既大日子,老細叫我唔好出席奠基,因為到時會拜偶像.如果人人'裝香'我拒絕會好尷尬,雖然覺得有o的遺憾但係我覺得老細係出於對我信仰o既尊重.點都好啦,(係唔係都好啦.)一切順主旨意!

生活

近日執屋準備要搬,唔怕老實講我真係好怕執同埋唔識執.

噚日因為公司停電所以放假一日,我中午去同實驗室班友仔食飯.跟住返屋企執,執執將o的慢畫書入哂箱.我執方面有一個好大o既問題,就係我好容易執到迷茫!執執唔知應該點執落去,好多時我執變搬.(將堆係咁搬來搬去,唔知應該執去邊度.)到夜晚大人睇唔過眼終於出手喇!佢執我o的手尾,唔使一陣就搞掂!重要幫我慳兩個箱!(真係勁!)大少因為成日走幫手所以俾我又打又鬧!我脾氣太容易暴躁喇,大人重擔心我返到香港生活之後會成日鬧交!(唉~!我又係衰o的o既......)

最近阿秋官主持'謎',我本身都幾鍾意睇佢.不過睇少少就有熄電視o既衝動!因為佢同另一個主持人成日做埋o的唔知咩o既手勢,非常之扮同難睇!重要加個'懶'性感o既'謎女郎'!睇見都打冷震!成個節目都唔知點摘稿,郁就'呢個係一個~~~謎!'好煩,成日詞不達意.聽極都唔明,好心無線認真o的喇,唔好當觀眾係白痴!

社會現象

中大學生報單擺明就係學生唔喇,佢死唔認錯真係令人擔心同氣憤.不過o的人係咁打擊佢就真係唔係辦法!你係咁打,佢就係咁撐.有乜謂呢?應該俾個機會佢同埋教佢明白佢錯邊先得嘛!當然最重要係令佢明白每個人要為自己所講所做o既負責任!做錯唔可以搵藉口.要知道自由唔係等於亂.如果個個為自己o既自由做自己認為o既咁個世界會大亂喇!要好好珍惜學習o既機會同時間,好多人想讀都冇得讀呀!唔好浪費社會資源呀!

今日上網發現一件令人擔心o既事,原來有人投訢舊約聖經內容不雅?!點解o的人可以咁做?!呢個社會越來越變態!