同大少分開咁耐,終於忍唔住要去睇佢!我10點鐘出發去到深圳轉火車去樟木頭.去到已經12點幾,我同大人先去銀行搞o的然後去謝崗.(大人外家)一如所料,度熱到飛起!屋外面當然唔在講!就算屋裡面開行風扇都熱到我傻!死喇!咁熱!點算呀?!唯有嘗試去忍受!到5點鐘,去幼兒院接大少.大少真係好好眼!離好遠都見到我,最初佢喊咁口想走過,但係未夠鐘.老師抱返佢入去.當我入到去接佢陣佢終於認肯同我講.(不過唔知佢講乜?!)
屋企附近有條小斜坡,大少同然然(老婆大佬個仔,今年3歲.)經常度玩.其實我唔係咁鍾意佢度玩!事關斜坡下面係馬路,偶然會有車經過.但係佢成日由度走出去,每次見到佢去玩都會令我心跳加速繼而腎上腺素急升.今次呢兩條友仲踩車衝落去添!衝到落去即時炒埋一碟.(我諗起jackass班衰仔!)佢兩個就笑到癲!我就俾佢激到就癲!唉~~~~~!其他人見到都好似冇乜反應,我真係唔明!係咪要出事先至會有反應?!定係我太緊張?!
另一樣另我覺得不安就係然然,佢最近同大少打交陣竟然出拳兜搥打大少心口! (我當場喝止!)呢件事一直令我覺得憤憤不平,我同大人講過呢件事.但係佢又係覺得冇乜咁!(..............)雖然我明白唔能夠要求一個3歲 o既細路仔會識分事非黑白,但佢有時o的態度的確值得我刮佢兩巴.因為佢唔係我個仔,所以我絕對唔打得佢!加上佢媽媽(阿嫂)對大少極之愛護!例如:有一次大少因為鼻塞,覺陣呼吸唔暢順.當時阿嫂竟然用口幫大少吸吮鼻涕!(雖然核突,但我覺得佢極之偉大!我極之感激佢!)所以我實在唔適宜大人同外家o的人面前講得太多,以免傷害佢.令佢唔開心!我亦因為阿嫂呢一份恩情而立志要對然然好.但係有時都覺得自己幾失敗!穌哥教我要原諒人70個7次.而我連一個細路都原諒唔到!好似有一次當佢沖完涼,佢'現'出個肚腩去向我炫耀件新杉上面有6架車仔陣.(呢件衫係我買!)我即時覺得眼火爆之後仲串鬼佢!佢囂張o既表情加上不可一世o既態度,我認為佢真係應該慶幸自己唔係我個仔!而我眼中佢只有係病或者係求你買陣先稍為表現得可愛.其餘時間只會令我搖頭嘆息!(大人都知道我唔鍾意佢咁樣,所以佢勸我要扮睇唔到,聽唔到.)不過諗深一層有時自己都係咁樣對天父.......
雖然天氣太熱,每日都扯火,加上大人竹戰連場.(我份人極之怕嘈,不過唔知點解又鍾意聽rock同heavy metal?!)但係我今次都有歎世界o既時候o既,例如:晚晚同阿豹,阿哥佢飲啤酒,燒食啦.夜晚去有冷氣o既旅館啦,當然唔少得同大人,大少過天倫之樂啦!今次真係冇錯!(雖然肥返.)
希望下次再見到個'串姪'o既時候,自己會變得大量o的啦!
今朝起身陣都冇乜,但係突然咳得好勁,好多痰!之後食完個早餐就覺得想嘔.我初時以為自己食得太飽,後來覺得個人暈暈.陣先知係感冒!於是啦啦臨食藥!後來仲發燒,我頂唔順所以入房一陣.老竇同阿媽本來想取消北上,但係我認為自己搞得掂所以叫佢放心北上.
