2007年最後一遍Blog

我今年一個人留係屋企渡過大除夕，係08年來臨之際。我決定幫部電腦大掃除！重新安裝Windows。攪左成個鐘頭，終於攪掂！希望新o既一年大家都生活得開心o的，祝大家新年進步！

突如其來o既消息,真係嚇到鼻哥窿都冇肉!

晨早俾老細嚇死!

今朝一返到公司,坐低冇耐老細就入o黎同我講.我個猶太人老細決定唔玩.我當時腦海一片空白,以為自己冇得撈.好在佢跟住叫我放心,因為佢同其餘一個老細決定繼續攪.所以我仲有工返.我即刻覺得鬆哂.識我o既朋友都知道,我好鍾意呢份工.希望可以快o的搵到生意啦.

耶誕天輪樂

連放兩日假期,一於hea o下.

24號

16點放工.返到屋企即刻打機.(大人同大少都午睡中.)夜晚食完飯出去德福行街街同影相.玩完一輪返屋企,我又打機.夜晚熄燈打gears of war真係另舍唔同.玩到1點就返房 目訓.

25號

成日都冇出街,一樣打機度日.曾經都傾過 o下北上.不過最後當然係冇上啦.到o左15點終於爆機.(打o左一個星期就爆,真係冇癮!不過隻game真係好正!)

 

26號

屈o左兩日終於捨得出街,我o地先去何文田探我阿 女麻.然後落旺角.食完晏就行路去尖沙咀,同阿仔o係中間道兒童遊樂場玩o左一陣.仲去埋玩具反斗城添!跟住想話食burger king,點知搵極都搵唔到於是去食美心.點知個飯極之難食!下次都係咪攪!我同大人行到腳都軟埋,不過大家都玩得好開心!

癲狗出籠怒噬狗男女

http://www.mpinews.com/htm/inews/20071223/gb70736w.htm

有冇攪錯呀!點解要咁做呀?!人o地要街已經好慘喇!你仲要燒佢?!為咩呀?!好好玩呀?!你呢對狗男女,捉你去BBQ就哂喇!

嚇醒

今日係星期六,要返半日工.估唔到我o既早晨係會由幾聲悽厲o既叫醒中開始.

o係我半夢半醒之間,聽到一把女人聲.好響好悽厲,最後將我嘈醒o左.正當我幻想自己將一個玻璃樽丟去聲音來源之際.我聽到個女人重覆住呢一句.......

你打X我,你打X我!

頂你個肺!晨早流流打女人?!仲要嘈醒我,我真係想打鑊你!!!!

 

放飛機

今個星期成日俾人放飛機,首先禮拜三本來約好個客上公司傾生意,點知佢冇出現.我俾電話問佢點解唔出現,佢話以為冇約到我.跟住o尋日再約佢下個禮拜,佢話今日一定o黎.終於都係冇出現.......

今日本來大人同大少話返o黎,點知佢話唔返喎.又一單......

仲有一單,不過唔知算唔算.所以都係唔講.

一個人o係屋企都有個好處,就係自由o的.可以打機唔受騷擾,不過個感覺有o的寂寞.

癲狗出籠之教育失敗,失敗教育.

噚日中大畢業典禮攪到一鑊粥就係人都知.

o個班攪事o既大學生讀o既係咩o野書我就唔知喇!

今朝o個個學生代表o係電台度幫噚日單o野辯護用o既係咩邏輯我亦唔知!

我淨係知道而家呢班細路真係好唔掂!你老母打得你少定喇!你o地一句示威自由,言論自由就炒起成個畢業典禮.咁你有冇諗過其他人o既感受同自由呀?!仲有o個o的示威o既畢業生,你到底去示威定去自己o既畢業典禮呀?究竟你班人知唔知自己做緊乜o架?你咁關心個社會就唔該你先學識尊重人o地唔係想做就去做.你認為o的呢個社會環境唔公義,就唔該你俾心機學習同埋去改變環境,而唔係去破壞,騷擾人o地.你有冇諗過你自己畢業o個陣,你俾人咁騷擾法,你又會有乜感受?!你可能唔在乎!不過o個日唔只你一個人畢業囉.有好多人寒窗苦讀,歷盡耕莘.終於畢業喇!終於經歷人生中其中一個光輝o既時刻,但係當佢發現自己個畢業典禮俾你班人攪到咁樣,佢又會有o的咩感受?!你o地可能滿有知識,不過你o地o既行為完全表現唔到你係一個有用o既年青人.而係一班爛仔.你o地咁o既表現同o的狗官,政棍完全冇分別.一樣係輸打嬴要,做事唔顧人感受.大家同類無謂狗咬狗骨喇!

小組小話劇

Part I
Part II
Part III
Park IV
Part V
Part VI