遠征意大利-9日

今朝返到公司上一陣網,然後開始send fax,報價.send e-mail,覆e-mail,打單......一連串工作.做,玩又做.晏晝同兩個同事食飯,今日間餐廳上菜好慢.食完晏返公司繼續.

放工之後直接返屋企,食完飯之後同大人,大少落街行一陣.返屋沖過涼,飲罐啤酒咁又一日......

表面上咁o既生活好似好無聊,但係當中有好多細節其實好有趣.例如:

今日張報價上面隻鞋印可以令成班同事開懷大笑.

挖苦個別供應商係信息黑洞可以換大家會心微笑.

一家人落街行又走可以令到小傢伙笑過不停.

屋企飲啤酒睇鬼佬做苦工可以釋去一身疲累.

用心發掘可以發現好多好多......

離遠征仲有9日

遠征意大利-10日

今朝晨早7點起身,整呢整路搞到7點10個字落樓坐車返教會.今日我負責早堂power point,希望趕得切同敬拜隊夾下敬拜詩歌.返到教會,敬拜隊已經開始練習.今日同我拍檔o既係C先生,佢知道我仲未係好熟個流程所以好細心教我同幫 我.講真自從上次搞到雞手鴨腳之後,我曾經覺得失去做好呢個崗位o既信心.不過經過今次之後我o的信心好似返!而事實上除C先生o既幫助,我亦 開始前為自己禱告.唔係因為怕自己再出醜,而係想為主做得更好.(事實上我事奉o既出發點就係為主,所以我明白我個老死點解咁勞氣!)

崇拜完之後,我一家去拜阿爺.(當然我三個係按照自己一套去紀念先人.)然後去sam 記屋企.本來諗住探佢就算,但係佢極之客氣招呼埋我食晚飯.佢呢排真係好辛苦,希望佢快快請到人,等佢可以,陪老婆.同我癲晚!

時間一日一日咁過去,聽日勁多做.要搞掂o的訂單,同埋繼續去準備展覽會.

離遠征仲剩返10日.

代禱事項 21/4/2008

工作
1.公司將於5月9日-12日期間到意大利米蘭參展,求主保守我們行程順利和平安.此外求主為我們準備多一些客人,讓我們今次能多做一些生意.(我們一行3人,包括我,老細J先生和同事A小姐.我們7號出發,13號回來.)
2.今個星期會準備米蘭展,求主賜下智慧.讓我們做好各種各樣的準備工作和設計展台.
家庭
1.為Sam 記禱告,因近期在他身上發生大大小小的事情使他疲於奔命.工作極之煩忙缺乏休息.
2.為靜儀好友阿群禱告,因她產期將至.
3.為靜儀禱告,因將要照顧阿群和同時照顧基基,求主加力.
個人
1.開始逐漸恢復靈修,求主幫助使我持之以恆.多從神的話語中領受教導.
2.近來發現自己容易動怒,有時甚至怒不可遏.求主幫助我學習好好控制自己情緒.
其他
為R小姐禱告,求主幫助她回轉.

癲狗出籠-----衰仔!你有冇家教?!

今日幫sam記去眼鏡,見到有個細路仔將一舊用過o既紙巾放一個撟埋隻手係背後o既阿伯手上.我當時望住佢,佢仲度得得戚戚咁.如果我唔係趕時間,我一定鬧爆佢!後來我行快兩步,話俾個阿伯聽.我怕佢舊紙巾跌落地下,俾人告佢垃圾蟲.罰佢錢,上法庭.咁就慘喇!

一 直都有個感覺,而家o的年輕人,細路仔對人,對事.極之欠缺尊重!好似前一排有個考A Level o既女生,貪得意.(或者係虛榮感作祟.)試場映相,仲放上blog度.點知俾人發現,然後網上討論區post出,引致網友猛烈評擊,最後推 post推到上報.考評局根據相片中拍攝到o既考生號碼搵到呢個女生,佢將有可能被取消所有考試成績.佢咁做就係唔尊重試場!(我覺得抵佢俾人扣哂o的 分!自己衰,唔值得同情!)

我一直認為,呢個世界咁亂其中一個原因係大家都只顧自己.唔理會人o既感受,唔尊重人.大至國與國,細至 人與人.要舉o既例子o既話實在太多,打到我手跛都打唔哂.所以如果想個世界美好o的,(老之後,行街唔想俾人整蠱.)我應該多為人設想,識得去尊重 人.最重要o既係要教導o的細o既咩叫尊重!

辦公室角力=EQ+IQ的較量?

近日聽到一o的關於某個同事o既評論,個同事涉嫌篤背脊.其實發生呢o的事係好正常,再加上只係片面之詞.事實未必係咁.有時老細問起上唔通唔講 咩?!不過呢個同事俾我o既印象的確麻麻!雖然主教導我要包容,尤其係o的對我唔好o既人.但係包容唔代表縱容!是非不可不分!我可以原諒你o既行 為,但係唔可以原諒你o既態度.

今日我因為一o的工作上o既需要而去同個同事商量,點知佢用一o的令我感到極之不快o既態度對我作出回 應.感謝主!賜下智慧,同忍耐.否則我當場發爛,表現自己o既'個性'.後果可能幾嚴重.皆因自己現時為止仍然屬於閒人一個,未為公司帶來任何進帳.如果 發爛將受千夫所指.(皆因公司一直表面上頗為和諧.)但係呢件事仍然令我屈心入面極之不爽!(老友,唔好介意我套用你o既用語!)當我嘗試安慰自己,發覺效果相反.尤其是諗到句:忍一時風平浪靜,退一步海闊天空!更令我火光!!究竟我應該點做?應該以咩態度去面對?我暫時未知,但係有一樣係肯定o既就係唔可以違反聖經教導.更要小心同事面前失見證.不過亦唔可以縱容佢,基督徒係要心地善良.不過唔代表我可以任人魚肉!

隱閉信徒

今日好驚喜,同同事食飯o既閒談當中發現原來佢係一位受洗o既主內.(太好啦!) 同時發現佢已經冇聚會喇,不過非常感恩佢仍然喜歡基督教.可惜佢好多時都拒絕佢o既家人同朋友邀請.我雖然未有機會同佢分享我信仰o既經歷同領受.因為 我唔想自己o既熱情嚇親對方,況且聖靈提醒我要為佢祈禱先進一步邀請佢返教會.(當然未必一定係我而家返緊呢間,雖然我係好想,不過佢住得比較遠.)同佢 傾落,覺得佢同未回轉之前o既我諗法好相似.佢好享受崇拜同埋極之喜歡聽詩歌.所以我返到公司立即將我手頭上o既詩歌同佢分享.希望大家幫手為佢同我禱 告:

求主將呢隻走失o既羊領返羊圈,並進一步認識真理.
求主讓我講合宜o既說話,好叫對各人都有益.

星期日

今朝7點幾醒,一直上網直至10點20分先死落去搭車返教會.去到車站等4個字先有車.返到教會睇到週刊即時俾佢嚇親!又一個傳道人要離開.我衝口 講句:又走多個?!搞咩呀?!當時我敬拜o既情緒即時受到影響,但之後聖靈同我講:你要克服你o既情緒,因為敬拜係為 神而設.唔好因為情況唔合你心意而去影響敬拜!但係我始終都集中唔到精神......

完崇拜之後同班弟兄姊妹食飯,其中有個姊妹提議去 深圳書城.但最終一如我所料:計劃流產.去唔成深圳唯有自己行街.我搭港鐵去太古城,行3個鐘之後又去銅鑼灣行到5點幾坐107返屋企.落車之後順便去 剪埋個死人頭.之後去惠康買食,我屋企附近只有惠康比較似樣,商場間百佳又細,種類又小.有時仲見到過期貨添!係我就執鬼佢冇咁嬲!!我好耐冇試過 今日咁行咁耐啦.好!所以今晚要好好補充先至得!








<登,登,登,登!今晚o既晚餐!辣辣牛仔粒配香滑薯蓉再加我o既至愛!>

30分鐘之後全部消滅哂!

忙碌替工王

呢兩個月連續有兩位同事輪流放大假去台灣玩,當佢出發之前就搵我做替工.平時得閒到恰眼o既我,當然求之不得!hea得太耐,呢個係絕好機會去操fit返自己喇!誰不知突然多好多自己要做!今日仲要爆埋鑊添!哈!呢鑊真係飽囉!可能每個人做事o既方式唔同,所以接手人工作時就有唔同o既體會.以供應商為例,平時聽o的同事講有某幾個人o的行為,態度都幾可惡!但係我接觸完之後,又覺得唔係回事.或者我對佢講比較陌生加上我係男性.又或者我語氣同態度上俾到佢有壓力.不過有樣係肯定o既,千祈唔好出錯,唔係就丟架喇!

做呀,做呀,做呀,做......尋晚就做到7點幾.人開始殘,加上發生o的令我有小小唔開心o既事.所以放工陣心情有o的差.話說老細星期一日開會,佢講及加人工o既事.我都有心理準備喇,自己未夠一年,加上仲未有客.加人工呢件事都係凍過冰水喇.老細話會噚日會安排個別會見去傾呢件事,我就見住o的同事一個一個咁入房傾計.出仲有講有笑,不過我就冇份喇!雖然有心理準備,但係咁o既情況.個心難免有o的酸溜溜o既感覺.不過好在記起朝早靈修段經文,再重覆睇多次.跟住好返大半,再加埋大人o既安慰......幸福雖然唔係必然,但絕對好過加人工.(不過有得加就緊係最好!)盼望5月展覽會可以搵多o的客,做多o的生意.咁樣出年今日我就可以笑住咁出公司門口.