兄妹對話

今朝返完教會,就參加每月一次祈禱會.最近禱告次數比以前多,代禱亦比以前多.
係咪愛上o左禱告?暫時未清楚...

我地o係陳教師帶領之下為7件事祈禱,完o左之後我就陪E姊妹去旺角買hard disk.

買完之後我就再去約阿妹飲咖啡同吹水.

我地咩o野都傾.工作,感情,成長經歷...無所不談.氣氛亦十分輕鬆.

我衷心祝福阿妹,亦希望佢搵到幸福.

香港書展2008

冇錯!今年仍舊去o左書展,不過今年有人陪.
我o地11點出發,去到灣仔12點.今年基督教坊仍然係我第一目的地.但係感覺上好似細過往年...

今年我買得唔多,我買o左一本書俾阿妹.兩本俾自己.一隻林以諾牧師o既DVD.同埋兩盒原字筆芯.本來仲會買多一本WWII o既書.但係o個檔o野唔收eps!所以冇買.唉~!咁大間書店開o既檔竟然收cash同visa唔收eps?!人o地間間都收啦!

呢間  大眾書店都唔知點做生意!!

去完書展坐船過海,去到尖沙咀同同伴拜拜之後.一條友去o左Ned Kelly飲番杯啤酒.嘩!我好耐冇o黎過喇!以前同阿John成日o黎.唔知條友而家點呢??

到o左6點15分,就施施然坐港鐵死去紅磡站.等齊人就一齊去萬國大酒店.今晚係迪迪仔阿 女麻 o既安息禮拜.o係開始之後,隔離房又同時開始.o的打鑼鼓聲同我o地唱詩聲成強烈對比!而大家o既'方向'唔同.
禮拜當中有95%唔知發生咩事.事關我o地人多要坐外面.隔離就好努力'break the hell'.,我o地o的姊妹好多都頂唔順.因為太嘈!而我就冇乜特別感覺,事關平時'訓練有素'.(熟悉我o既朋友你o地都知點解啦.)

禮成之後我o地一班人去食飯,當中有人提議8月底打保齡球.立即全體通過並立即叫我打電話俾天使學徒.點話接通後講o左兩句就俾小路大人搶o左去.後奈佢好開心咁彈返o黎話天使學徒會同我o地去玩.大家立即起哄!

問心無愧

前晚同阿妹傾電話,佢面對一件艱難o既事.我聽見佢咁唔開心,我覺得非常難過!但係佢好堅強,好勇敢去面對事情.我好欣賞佢o既態度!我相信佢會勝過困難.

阿妹,我要同妳講一句: I'm so proud of you!

o 尋日我狀態好差,工作好似做得好慢.我好唔滿意自己o既'效率'.放工之後我o係內心不停思前想後,責備自己.由公司去地鐵站條路都好長,要行2個字左右.我行得好辛苦!因為心情非常差!後來去到地鐵站先發現原來有樣o野未問個客.點算呢?返唔返轉頭呢?我不停咁諗.最後我都係返轉頭,因為我覺得自己應該返去搞掂佢!除o左係責任問題,仲係因為我唔想做一件我可能後悔o既事.

返到公司,我用o左15分鐘,send o左個e-mail俾個客.然後走人.

同樣係o個條路,同樣要行咁耐.雖然個袋重o左.但係我心入面o既負擔輕o左好多.我今日總算做o左一件我滿意o既事.今次行呢條路感覺得輕鬆好多!

辦公室玩o野實錄

食飽飯冇o野做,我同喪B又開始玩o野.今次我o地玩扮惡!

呢度邊個唔識我喪B姐?!

我唔識又點呀?!

俾錢呀!

又再失眠

又再失眠...
我每一次 目訓覺一醒親就 目訓唔o番.今次又係咁.

我噚晚22:15放工,返到屋企23:15左右.冇做過乜o野就目訓.事關今日要見客,所以想爭取多o的休息,半夜大少發現大人唔係陪佢 目訓,就起o左身搵人.我就係咁樣醒o左.

我有嘗試 目訓返,但係一諗起某件事我就 目訓唔o番!(咩事我唔想講,我唔擔心.不過十分掛心!)

半夜三更 目訓唔o番最大問題係肚仔餓,因為唔想嘈醒大人所以唔敢煮o野食.唯有餓住個肚...

睇o黎今日會幾難捱!

冇腦

唉~!我噚晚返到屋企陣,大少用我部電腦睇緊thomas火車vcd.當佢睇完,我就諗住上網.點知發現touch pad上面一撻糖漬.mouse 用唔到,touch pad 用唔到.系統顯示usb有問題.

card reader 盞燈熄o左機仲開住.今次重傷!

諗住用返部殘desktop,點知開唔到.思前想後決定搵人求救.希望星期一會回復正常...

度不記名多謝出錢出力o既好友,兄弟們!

噚日亦都係俾客投訴o既日子,心情有o的低落.
不過同阿妹傾一陣心情好番小小.

雖然老細認為唔關我事,但係個心仲 up住up住.
今晚又見到另一個客em用大隻字.個心情又再一沉.不過喪B同我分析過.佢認為個客未必係唔滿意先用大隻字...

今日又發現自己又有o的地方做得唔好,又係一個改善o既機會.

希望自己以後能夠做得再周全o的.

古板港人同螺絲大鬥法

噚日朝大人好早叫醒哂我,之後全家落哂街食早餐.食緊早餐陣佢同我講,覺得香港人好古板,連佢o的朋友都好認同.佢話原來唔單只係我古板,佢朋友身邊 o既另一半都係咁.例如煮即食麵,包裝話煮三分鐘,就真係三分鐘.我話:如果唔係咁,香港邊會咁有秩序呀?!佢當場大笑...

返到公司準備o的板寄俾客,發現有幾個板甩螺絲.有o的配件仲唔見添!我搵好耐都搵唔到.最後唯有拆其他板配件代替.點知我寄哂o的板之後,粒螺絲就出現...激死!

近日知道好多人病,最初係大少.(而家好.)跟住係教會有個姊妹,然後到大人.大家小心o的保重身體.
星期五要送女俠機,機場實水浸......

美麗o既婚禮帶俾我奇妙o既經歷

上星期六係馬仔同Winnie o既婚禮,我就梗係著好o的去觀禮.點知要拉貨去船公司,本來仲擔心著成咁好唔方便.點知發生呢件事......

當我去到船公司,老板娘公司入面望住我.然後行出同我講...

老板娘:乜要你親自送過?!

我:係呀!(你見到我,就梗係我送過啦!仲有邊過??)

老板娘:我搵過人幫你手!

於是有個後生仔出幫我,平時我送貨絕對冇o的咁o既事發生!加上我平時都係T恤,牛仔褲加波鞋.

攪掂之後,佢返入去開單.個職員好緊張,猛同我講sorry,同埋好快攪掂.之後佢單出俾我仲俾張咭片我,話本來老板娘叫主管出同我傾計不過佢唔得閒.....(佢講陣口都窒埋)

當我張件事同L小姐講之後佢都好驚訝,事關我之前好多時都係佢同C小姐推貨過去.從來都冇發生o的咁o既事.

佢一定認錯我係老細,所以先咁好招乎.

瘋狂的一夜,沒有淚水的告別.

噚晚係為女俠而設o既告別晚會,今晚我仲叫埋天使學徒一齊.事關上次食完飯之後大家都鍾意同佢玩,好想認識佢多o的.加上佢同女俠都算係相識.計埋都係朋友同主內.所以特別吩咐我叫埋佢.

我一開始就玩層層疊,天使學徒提出幾個'變態'o既玩法,使到遊戲進度急劇加快!

然後各有各傾同玩,有得食就再聚返一齊.一輪狂風掃落葉,所有食物一掃清.

期間我仲屈天使學徒一餐,希望佢會識做.自動找數.

至於我,我就做寸咀棟篤笑.不停揶揄各人同揶揄自己,我發覺自己都幾大膽.(滴汗!)

我仲'邀請'女俠唱歌仔同埋講返兩句,不過催淚不成功.(可能要留返送機.)

我仲拍幾段片,不日放映!

除o左女俠,我仲有一位女主角.就係勁遲!呀!唔係!

應該係敬慈先!佢噚日生日呀!

好啦!有相睇!Enjoy!!

危危乎層層疊

有人等睇戲

女俠:望咩呀?!未見過靚女呀?!
怒漢:...........................有o的咁o既事?!
(設計對白)

女俠:你睇我幾嬌俏!
怒漢:你講咩?!

T君:你條死仔,咁寸咀?!
怒漢:壯士饒命呀~~~~~~~~~

怒漢:搵人郁我?!
天使學徒:事不關己......
女俠:夠膽攪寸我個party?!唔識死!

女俠:我o既志願係......話說我出世日..........
邦少:嘩!講9個字仲未講完.......

Joe:你有你講,我有我食.
劉明: 咪理咁多,兄弟同我乾佢!
任:冇呀?!飯喎!

祝:小小意思
敬慈:唔成敬意
Mi:攝位成功!
小路:......

祝,小路:攝返妳!
Mi: lol

怒漢:我都唔執輸!

大合照

灰色軌跡

呢隻歌,講出o左我最近o既心聲.

  灰色軌跡 - BEYOND
    曲︰黃家駒
    詞︰劉卓輝
    編︰BEYOND

    酒一再沉溺　何時麻醉我鬱抑
     過去了的一切會平息
     衝不破牆壁　前路沒法看得清
     再有哪些掙扎與被迫
    踏著灰色的軌跡　盡是深淵的水影

  ＊我已背上一身苦困後悔與唏噓
     你眼裡卻此刻充滿淚
     這個世界已不知不覺的空虛　哦
    不想你別去

    心一再回憶　誰能為我去掩飾
    到哪裡都跟你要認識
    洗不去痕跡　何妨面對要可惜
    各有各的方向與目的
    踏著灰色的軌跡　盡是深淵的水影

    重唱　＊

    踏著灰色的軌跡　盡是深淵的水影

    重唱　＊,＊

心情低落中,竟然經歷神o既奇妙作為

今日仍然為尋日件事而唔開心,工作雖然冇咁忙但仍然令我頭痛.不過都順利完成.
冇諗過神會以呢種方式令我重新振作,實在太神奇喇.估唔到自己咁需要安慰o既時候藉住對親愛o既主內付出安慰,鼓勵同代禱而令自己經歷神o既深恩厚愛.實在太奇妙喇!

對於我同當事人呢件事係小小o既祕密,對於我自己係一個好大o既祝福同鼓勵!
晚上再有幸同佢分享自己小小o既心得,感覺自己唔係咁冇用.不過講返自己o既傷心事就好似結焦o既傷口破裂咁痛.尤其諗起自己對某人o既承諾未能對現,我覺得心如刀割.

vodka加檸檬汁可以暫時止痛,但係一覺醒來又會如何??

埋沒良心, 好戲量爭o的令我仆嚫.

今日做件埋沒良心 o既事,呢件事係道理上係正確.但係人情上完全違反我o既個人原則.我覺得呢件係兩難o既事,或者係我未夠火喉唔識妥善咁處理呢件事.我覺得已經唔可以抬起頭去面對當事人.我問心有愧!我知道我再自責都冇意思.因為件事已經做但係我以後係咪可以本住一貫o既方式同態度去做人呢?或者有人認為我唔成熟同任性.但係我想問,麻木係咪等於成熟?!做返自己係咪等於任性?!如果係o既話咁我寧願做一個唔成熟兼任性o既人.我都唔願意去做一個虛偽o既人!

放工去旺角散心,去到行人專用區爭o的俾一張貼地上面o既橫額kick到.我一睇原來係好戲量o既傑作!其實我對佢冇好感,事關佢成日霸佔住行人專用區去宣傳.更加憎佢成日攪埋o的懶係有深度o既所謂話劇.仲唔知醜到拖埋黃家駒落水,整齣咩'駒歌'喎.好聽o的就話你抽水,唔好聽就話你發死人財!我同你班好戲量講呀!你小心整親人呀!最好唔好貼o的街上面,仆嚫人,人告得你!除呢班友我都好討厭o的行人專用區擺檔o既人呀! 霸住條路,有o的仲騷擾途人.其實有關部門係咪應該去整頓度呢?!

好忙呀~~~~~~~~~~

呢個星期過得真係好快,放一日假.返到公司係咁做,做,做.好似做極都做唔完.以前希望自己忙o的.點知而家忙成咁!不過我都冇後悔,或者遲o的會好o的呢.......(希望啦.)

今朝個心情極之差!因為近日有o的困擾住我,我朝早祈禱陣交託俾神.到接近6點安慰就臨到.真係好感謝神!

今晚ot到9點,因為唔想聽日都仲要o,死都要死哂o的.如果唔係我實會俾o的工作'浸死'
放工去食,然後返屋企.沖完涼飲兩杯'涼茶'......
天時暑熱,最好都係飲兩杯'涼茶'......爽呀!

改變

呢排好多改變,有時變到自己都有o的頂唔順.

本來係'三人幫'而家變'二人搞笑組合'

本來係冗員,而家變OT狂魔.

總之就多變化啦!

今晚OT到8點,勉強叫做搞掂o的.今晚如果老細早o的走,我相信我可以做得快o的.事關佢度我唔可以聽歌.但係同時我又唔想我o的歌嘈到A小姐.

之前話我同佢係二人搞笑組合真係事實,因為我不停咁有意無意製造好多笑話令對方發笑.簡單一句: 'You look like a 摩囉差'已經笑到反艇.(如果有印巴藉朋友睇呢個blog我要同你解釋,我唔係笑你,我係笑個音.)

返屋企前去麥記食個飽,我個至愛'黑椒漢堡'又有得賣喇.其實晏晝A小姐已經話個飽唔好食,不過我仲想俾個機會佢.點知佢真係俾個機會我.俾機會我鬧佢!好心你班友就咪咁鬼孤寒啦,落多o的汁係咪會死先?!你知唔知個飽最好食o既地方係乜呀?係個汁呀!咪鬼賣23.5啦,我寧願你賣25蚊,唔該你加多o的汁!九年唔出一次做好o的好唔好?!頂你!

返到屋企用橙酒,Vodka,梳打水同檸檬汁溝埋一齊,飲完有小小醉醉.上網寫埋萹blog之後死去.

聽日再搏過!