百感交集

最近o的情緒非常複雜,咩o野都有.感覺自己有好多o野想講,但係又講唔出.你問我係咪唔開心呢?又唔算係.開心咩?又唔覺.真係唔識點講...
可能自己呢排諗o野諗得多o左,對於工作同家庭o既平衡考慮得多o左.所以好微小o既事都會觸動到我o既神經...

工作o既事忙到唔識點講,學喪B話齋:做極唔完!客人D帶俾我o既麻煩越o黎越多,令我o既皮質醇指數急速飆升.不過有日老細J先生幫我出返啖氣.事關佢都認為客人D做法好有問題,所以特別打電話剷佢.我頓時覺得心涼.點知客人D之後打俾我,想搵我發洩.因為老細J o既電話,佢俾 全office o既人鬧.(俗稱圍插)正當佢想同我 '理論' o既時候.我就插埋佢一份,佢勢估唔到原來我係跟緊J先生隊,持有2號籌.等住插佢.而家全世界以佢為敵,佢真係可憐.

煩o左咁多日,終於有機會玩.我真係好需要癲o下,o尋晚我o地小組就搞食飯同打保齡球.我真係玩得好開心!好耐都冇試過咁.尋晚o既賽果分為兩個極端.怪獸,ricky 同階階都打得好高分.我同E姊妹都不分高下相差7-10分.不過我同佢都做o左'坑霸'.事關人o地碌齡,我o地兩個就碌坑...

返到屋企大人同大少都仲未訓,我幾驚大人會怪責我玩o左成日冇陪過佢o地.不過以後都係要俾返多o的時間佢o地先得...

睇開o的

做人o既o野

 

要睇開o的.

視野要廣闊o的.

要做到呢點我o地需要....

 

一副大眼鏡!

 

呢o的就叫做Style!

 

你明唔明我講乜?!

抑壓-->禱告-->受激勵-->釋放力量

今朝起身回憶起一o的事,又諗起自己身上發生o既唔如意事.心入面感到非常抑壓,於是向神禱告傾訴.好快聖靈o既激勵臨到,我感到好似充滿力量.愁雲慘霧一掃而空!開開心心返教會.

最近開始返主日學,學習如何做一個守望者.如其話守望,我覺得自己較為適合做別人o既同行者適合一o的.但無論係咩心志,一定要有裝備.否則一個瞎子領住另一個瞎子,後果可想而知.我覺得呢個課程好好!溫故知新,回想自己被栽培已經十幾年前,好多o野唔記得.將來可以幫到人,而家可以幫到自己.真係好!

午堂完o左之後有祈禱會,之後食o野.食飽之後去探安老院,我同J姊妹一組去同一位伯伯傾計.伯伯後生o既時候曾經有光輝o既日子,經歷死裡逃生.可惜同家庭關係唔好,離棄家人遠走.雖然妻子願意原諒佢,但係自己仍然唔肯原諒自己.覺得愧對家人.伯伯講到自己身世不禁流淚,唉~!人唔傷心就唔會流眼淚.o係當中我心入面有感動,好想同佢分享浪子o既故事.我希望呢個故事能夠安慰到佢.最後我同J姊妹為佢祝福祈禱.

阿伯o既經歷對我o黎講真係一個好大o既提醒,尤其係我而家銳意發展我o既事業.比以往投入更多o既時間同精力去工作,務求有進步甚至有所成就.但係亦應該要回頭望o下自己奮鬥o既出發點....家庭.真係要警醒,切忌'走火入魔'!本末倒置!!為o左屋企人(無論係咪一齊住o既家庭成員)我要奮力作戰!!

見客記

尋日又有客見,呢位P先生係來自A國.佢係我一個比較好o既客,事關佢好易話為,份人又隨和.又鍾意講笑,但係又好坦白.

去到地鐵站見到佢,正想叫佢o既時候佢又行開.原來佢張飛有問題,跟住搞o左一輪就出得閘.然後我o地去食晏.我本來叫o左個意粉佢叫o左個千層麵.不過o的侍應問都唔問就放o野落張台度,佢又餓到飛起.於是我o地就交換午餐.

食完飯,吹o左陣間水就埋單走人.返到公司我o地對單,傾o野.搞到1700,跟住佢就走o左.

我用o左個幾鐘去抄file同整理o的文件,然後帶返屋企做.點知帶漏一份文件,所以提早收工...

其實我本來想o係度鬧人,不過為免當事人有麻煩.我都係要忍o下口.我可以講o既係,果o的別有用心o既人,你唔好以為自己好叻好醒.不停合理化你自己所做o既!呃人呃自己,你好可憐!

果o的自以為是o既人,好心你成熟o的.唔好為o左自己開心而去搔擾人o地.再搞落去大家都唔好,小心我o黎搵你開party!!
係咁啦!講完!

子承父業,終於輪到我

上個星期六得登補假,同兩條o靚仔去大清水游水.果日太陽好猛.如果唔用太陽油就一定變黑人.記得以前老竇帶我o地去游水都會擔任一個極重要o既角色.

登...登...登...登...就係看住o的o野.到o左今時今日呢個家族入面o既重任就當然落o係我身上.

大人就陪果兩個大少落水玩,我就係樹下面看o野...
過o左2個鐘頭,就游完水.返到屋企發現大人晒傷o左...

深夜OT手記 14-8-08

今日大人同大少仲有然然一齊返o黎,我放o左工之後o係九龍塘等佢o地.我心情非常忐忑.可能掛住o的未完成工作所致.雖然知道陣間返到屋企會做好但係個心覺得好煩.

接哂人,食完飯就返屋企.大人今次帶o左手信俾我.係一支vodka,我恨不得立即試味,但係今晚要ot,所以都係遲o的先.

到o左差唔多2300就開工,不過我抄o既file唔夠update,所以工作只可以做到目標o既一半唔夠,聽朝要返去補飛先得.

今晚心情認真差,我俾兩件事纏繞住.兩件都係令我非常傷心o既事.縱然耳機響起o既係最能令我冷靜o既強勁音樂,但仍唔足夠令我平伏.內心悲痛不已,我終於忍唔住,離開坐位.去向天父傾吐我內心o既痛苦.之後靠住 神    o既恩典去完成餘下可以做o既工作.

我係一個soho份子??

o尋晚我約o左C弟兄夜晚食飯,(與其叫食飯應該叫宵夜比較正確.)我地去o左九龍灣某一間酒樓.我地坐低叫o左三樣o野,叫完o野食我o地就吹起水o 黎.我o地都傾o左唔少o野,天南地北乜都傾o下.講o下自己,講o下人o地.(唔好誤會!唔係講人事非!!)當中弟兄對我有個提醒,十分受用!我要o係度多謝你!!

不過o的阿姐就令我覺得有小小唔開心,事關佢o地唔耐煩.成日想我o地走.唔係我o地乞人憎而係佢o地想收工.旁邊部長都勸佢唔好發脾氣.不過作用唔大,講到呢度我覺得佢同我都係差唔多level.因為我同佢都犯o左個大錯.就o係客人面前發嬲.我其實呢幾日都俾客人D煩擾住.事關佢要求我係有限o既時間內做好哂o的文件,而同時佢又不停打電話,message煩我.但係佢忘記o左兩樣    o野: 1.我唔只佢一個客. 2.我已經連續幫佢做o左兩個星期o野.而佢期間不停更改訂單.令我覺得最激氣就係有一次,我用o左成晚ot時間幫佢改好張訂單.諗住第二朝send上廠.點知佢又改o...我有o的崩潰o既感覺.講返轉頭我都幾服喪bi.咪睇佢細細粒,佢真好o野.就算嬲到極點,都唔會好似我咁發哂癲.好o野!

返到屋企,立即開工.因為我唔想錯過同C弟兄食飯吹水 o既機會,所以我帶哂o的'功課'返屋企做.我一面做一面同朋友msn做o下,做o下就做到2點幾.

至於今日,我有個諗法.就係索性以後放工之前抄好哂     o的file,然後帶返屋企做.有咁o既諗法係因為大人同我講,叫我唔好咁沈迷ot.要顧o下個仔同佢. 我當時係拒絕 o左咁做.但諗深一層佢的確有道理!我唔使捱肚餓,返到屋企可以沖個靚涼然後同大少玩一陣之後休息一陣再開始搏命都未遲.所以我聽日會去買個 harddisk,抄哂office o的file.然後帶返屋企做.以後早o的返屋企...

搏命呀~~~~

今日係星期六,係搏命o既好日子.因為電話少,而且ot完先天黑.感覺冇咁 支力.

尋日同樣係俾客人D激親.一連打幾個電話問一單o野.煩!到我ot完之後仲打o黎我手提.唉~~~煩極!佢係唯一一個激到我爆粗o既客!

希望以後唔好再忍唔住爆粗,因為我真係唔想再講粗口喇...

                <搏命用食糧>

莫名其妙o既變態

http://news.on.cc/hknews/index.html?file=ncbrka00_20080806235139

http://hk.news.yahoo.com/article/080807/3/7ksj.html

o的人係咪痴線??癲得咁離譜!搞到我同喪bi笑到不停!

聽晚又要開始無止境o既OT...

雖然今日俾客人D激到掟o野,不過今晚過得好愉快,先苦後甜可能就係咁解!

我愛8號波

今日真係可以好好休息,除o左晏晝出街買o野食之外.我都係懶洋洋咁攤o係張梳化度,或者床度.
前兩日喪bi先同我講我眼皮多o左好多摺紋.雖然我唔係一個貪靚o既人.(都結o左婚,做埋老竇咯.貪乜鬼靚呢??)但係都擔心隻眼變得咁醜.希望訓多o的會有幫助...

今日同老竇傾計,佢問我適唔適應而家o既生活.事關都幾大改變!我其實覺得自己返o左o黎香港仲開心o左.同人o既關係親蜜o左好多!而且香港俾我o既安全感同方便程度真係獨一無二.以前o係日本居住o既時期都覺得日本係好方便,不過始終唔係自己地方.語言亦有障礙.所以一直都覺得香港好.不過呢幾年覺得香港好似倒退o左...

例如今日睇新聞,見到有班學生冒住大風大雨o係學校門口排隊.仲叫'派籌'.我睇到眼火爆!大佬呀!而家打風呀!! 邊度可以搵人返o黎派籌俾你o地呀?!有咩事保險唔保喎.你要癲點解要人同你癲埋一份o者?!都冇解o既,自己認為o岩哂大條道理.有o的家長仲陪佢o地傻埋一份!癡線!!呢班咁o既人出到o黎社會都唔知會點囉...

而家o的報紙,都唔係報紙.只係日刊版o既八婆雜誌.內容嘩眾取寵.日日講到香港末日咁!成日煽動香港人反政府.係香港政府的確有o的地方做得好差,不過我o地唔應該淨係得個鬧字.我雖然唔識政治,但係我一定去投票.唔想香港敗o係o的政棍手上就要小心揀.

其實我仲有大把o野想鬧,不過今日就鬧住咁多先...

痛苦中o既甘甜,醒o左又訓唔返...

話說o尋日本來諗住做夜o的,因為好多手尾要跟.但係真係頂唔順.於是1815就走.諗住返屋企,食完飯就訓.正當我架小巴就到總站之際,電話就響.原來係某人,同佢寒暄兩句就決定見面一齊飲杯o野.於是當小巴到站,我就等o的人落哂車,我就俾多次錢.然後返埋原位再坐.司機阿叔忍唔住望o左我一眼.(我諗佢可能覺得我玩o野.)去到約會地點我差唔多不停換位.直至佢o黎到...

我o地傾到差唔多2100,臨走前佢話我知佢腳痛.我有o的擔心佢.

返到屋企,同老竇傾o左兩句.食完o野,祈禱上床訓覺.我好感恩,可以同某人見面.而且傾得咁開心...

今朝0445我醒o左,一直都訓唔返.好想知道打唔打得成風.結果到o左5點幾6點就掛8號.太好喇!(對我黎講.)我實在需要休息.

雞毛鴨血中,想怒吼都冇力...好在有飯局!!

我呢兩個星期真係慘!因為客人D又o黎o左...

連續幾日做到好夜,上星期四仲帶埋客人J一齊o黎.惡夢就開始喇...

星期六我稍為可以休息,可以返小組.又可以開懷暢飲.不過o係小組發生o既怒吼示範事件到而家仲講緊... 哈!

不過,我一o的都唔介意.大家開心就得喇.相信短期內都唔會再怒吼.因為我已經殘o左.

我今次o既'殘度'比上次米蘭返o黎之後更甚.o的同事都好擔心我.關心我之餘又鬧客人D變態.有人為我出頭o既感覺真係好.多謝大家!

俾客人D折磨o左幾日,我終於頂唔順.我決定唔理佢...一晚咁多.(真悲哀!)

為歡送子樑弟兄(叫慰勞好似適合o的)我o地成班人去o左九龍城食泰國菜.如果係平時,我一定玩到好癲.不過我今次狀態太差,所以冇玩o野.唔講咁多!睇相啦!!