今日係出發o既大日子,心情冇乜特別.朝早0600起身,覺得仲係唔多相信自己今日去美利堅.心入面一大堆禱告事項.寫完個blog就去搵最高指揮傾o下.
有人曾經問過我,鍾唔鍾意呢種生活.成日出trip.成日離開家人同朋友.其實好睇個trip係咩性質,如果係好似以前咁去補鑊o既話,真係咪攪.但係好似呢兩次咁,我就可以接受.離開屋企人,朋友感覺當然唔係咁好,但係為o左工作都冇辦法.
前兩日先同大人傾過關於工作o既問題,佢都係擔心我壓力太大.不過我做o野o既態度係咁,我都已經盡量放鬆同搵多o的時間陪大少.可惜o係佢眼中仲係未夠,既然係咁.我要再努力o的先得!
代禱事項:
--樣板順利通關
--旅程有順利
--成功入境同過海關
--順利cold call o的客
--搵多o的生意
--適應時差
--良好o既溝通
--英文講得清楚,聽得明白
係咁多!去到美國再見......
終於到o左最後衝刺o既關鍵時刻,o的煩o野今日顯得特別多.有個客知道我聽日要走.就拿拿臨將我個幾星期前叫佢覆果o的o野一次過覆哂.仲要我今日處理哂...唉~!點解o的人要咁對我呢,你唔通唔知一個人臨出trip係好唔得閒o既咩?!
好喇,去美利堅o的板依然生死未卜.極煩氣!常客賤人D終於對我做返o的好事.而張To do list o的item越來越少.實在係好現象,下午同V姊妹網上吹水.知道佢o既近況覺得有o的心酸,雖然一邊不停講笑但係都抹唔去我心入面o既感覺.酸酸o既感覺.希望佢快快康復,我又可以快快對現承諾.
今晚約o左傻人好友上我屋企食飯,食完飯之後執行李.我向佢示範o左我o既獨門祕技...極速摺衫法.佢好聰明好快就學識.希望佢仲記得啦.
離出發仲有一日......
如無意外,本blog o係美利堅之旅期間將會每日更新.敬請留意.多謝!
今日我決定要做好哂o的o野,星期一返工要最後衝刺.
所以我今日冇返教會,希望尊心工作.大人可能知道我需要一個清靜o既工作環境.所以一早就帶o左大少去samkee屋企.我就留o係屋企做o野.
做o下做o下就做到18:00,好似攪掂哂o的o野又好似未攪掂.到o左19:00所有人都返哂o黎.然後食飯,睇電視同訓覺......
離出發仲有2日......
今日係星期六,日子無多.所以要盡快做好哂o的o野,如果唔係就大煲!
於是,我就開始博命.點知收到個唔想收到o既電話.就係速遞公司打o黎,佢話我o地前兩日寄去美國o既樣板而家扣o係海關度!叫我修正o的資料.(大鑊!)於是立即放低哂手上o的o野然後去攪呢單o野.攪o黎搞去終於攪掂.要星期一先知結果.希望批板平安無事.
到o左中午原本o係要放工,但係我已經冇時間所以我要OT,加上有客到.見完個客都16:00.我就做到18:00先走.
今晚完o左小組之後,組長M小姐同我講,叫我考慮去完美利堅,忙完之後就安排時間同新組員R先生做守望者.做栽培.我一口答應.M小姐仲立即同R先生講返呢個安排添.(感謝 主!能夠與人同行係一件好有意義o既事!)
離出發仲有3日......
今日係一個好緊張日子,是關諸事不順.麻煩一個又一個.煩惱增加,歡樂減少.
不過放o左工就完全唔同哂,去o左九龍城食飯.去到第一間食 o左好多好o野.尤其係生蝦刺身,燒側魚.真係好味.食完之後仲未飽又去第二間食過.施蚶太熟,蠔仔蛋俾o的味精破壞哂o的鮮味.不過都係不過不失.食完就散o下步.行到去黃大仙坐港鐵.返到屋企ot一陣.搞掂就訓覺.
多謝傻人相伴,一齊食,一齊飲,一齊笑,一齊癲!
離出發仲有......4日
o尋日情況開始好轉,不過同廠有o的拗橇.希望快o的解決,其實當中大家都有問題.不過廠唔想承擔責任所以想乜都賴哂我.仲想撩交嗌,不過我費事啋佢.等佢冇哂癮仲過癮.
我真係唔明,咁多溝通渠道.點解收唔到信息?!仲好意思同我講收到張單不過冇print out. Fax機冇紙冇人知.電話又成日搵唔到人.唉~!點攪呀?!
經過一論惡鬥終於收工,我o地三人幫又再次集合喇.hahaha!我o地去食韓燒...
好高興見返R妹,佢同以前一樣咁鍾意笑.我o地傾o左好多o野.大家都好開心!
食完飯之後行o左一陣街街,我本來睇中一件衫,不過可惜冇加大碼......
離出發仲有5日......
今日嚴重睡眠不足,因為o尋晚OT到今朝早0445,終於不支倒下,起返身就發現已經係0630.拿拿臨做埋o的o野.然後返工.
因為我過幾日就要飛所以要o係就之前盡量做哂o的o野.我覺得我今個星期將會死得好慘!
離出發仲有6日......
今日大家都好期待天文台掛8號風球,但係天文台成日都公佈埋o的'可能'o既信息.好心佢o地唔好玩我o地o的打工仔女啦.係就係,唔係就唔係.你呢邊死都唔肯掛,果邊又停航又停駛.咪玩啦你!
個行程有o的麻煩,有個大客好似預唔到時間.希望見到佢啦,而我今日開始會勁多o野做.事關我要整理好身後事俾同事幫我跟.今日同時俾廠同客人激親.不過呢樣o野每一都發生...
夜晚睇電視,講o的奶農有幾慘.唉~!永遠都係o的有權有勢o既茂利貪錢搞到好多人雞毛鴨血!呢班賤人害o左唔少人.為o左錢不擇手段,叫你人渣都過獎o左你呀!
離出發仲有7日.......
終於知道美利堅之行o既行程,我o地今次會去4個城市:洛杉磯---拉斯維加斯---丹佛---紐約.除o左探o的舊客仲會去展覽會同埋cold call o的新客(認真有挑戰性!)
大家都俾好多意見我,其中E小姐因為上年去過.所以我問o左佢好多問題!
至於其他同事,形形式式o既建議不停出現.例如:暫時放棄減肥計劃,唔好出夜街,小心黑人,小心基佬...等
我又向Samkee o既舅仔打探o左機票o既資料,有兩間可以坐:聯合同國泰.因為前者呢排成日出事,又要去三藩市轉機價錢只係平千幾蚊.所以都係坐國泰lu.
不過睇o黎今次都會有唔少困難......
離出發仲有8日......
上個星期五,對我o黎講係一個大日子.因為係我第4次去申請美國簽證.今次係為o左工作而去美國.我好想去得成.因為今次一定會學到好多o野!事實上今次見到o的客隨時都會俾佢o地鬧到抽筋.我都已經有呢個覺悟,雖然大家都話今次會好輕鬆.但係我唔會掉以輕心,喪bi曾經同我講,話我逼得自己好犀利.叫我放鬆o的.我覺得好開心,因為我有個咁關心我o既朋友仔.但係可能呢o的就係我o既性格,所以好難放鬆.(喪bi,真係唔好意思!)
講返果日我真係好開心,因為我之前申請o左3次都唔成功,今次終於得o左!其實我曾經都好擔心尤其見到有人抬起頭行入去,dup低頭行返出o黎.今次見我個位領事館人員好友善,我同佢傾得好開心....
返到公司又俾o的工作浸死,不過有件好得意o既事發生...
就係喪bi個客投訴o的product fail o左個玩具測試,我o地傾起上o黎.我覺得自己有種重操故業o既感覺.(事關我果日因為見領事所以著o左成套老西返工,又同喪bi傾o左好多化學o野)不過我成日俾L小姐笑,真慘!
各位:我決定今日還BLOG債所以會一口氣寫4篇BLOG.之前已經有一編,請大家留意.多謝!
