星期六放工,同大人,大少行宜家.見到一張$200 o既電腦台.其實一直都想o係屋企整一個小型辦公空間.因為屋企冇一張台o岩用.(電腦台空間太少,食飯台太高做o野吊手唔舒服.)所以經過快速o既家庭會議,立即決定買呢張台返屋企.
返到屋企,兩公婆夾手夾腳用o左大約九個字至一個鐘頭時間裝好張台.然後移位,最初o既位置唔係好理想,後來我返小組.大人搵o黎師奶兵團從長計議,終於攪掂.
終於有個位可以俾我正正經經做o野...
而另一張電腦台就放成咁...都算ok喇...
星期日要收拾搬位期間所發掘出o黎o既雜物.都o左晏晝我o地一家三口去o左旺角.
食o野同埋買文具.(工欲善其事麻...)
今日難得全家返教會,返完之後同班弟兄姊妹一齊去飲茶.飲完茶之後一家人去行街街同埋飲咖啡傾o下計,傾o下心事.本來係幾美好o既事,點知......
個死賤格佬客人D偏偏就打電話o黎,猛問我點解冇寄FedEX俾佢?唉~!我當場俾佢問到口啞.
喂!幫你寄o野唔係我份內事,你已經唔再係我老細!咪o係度點生哂好唔好?!
你話o的o野對你好重要,點解你唔自己寄?!
破壞我個Family day咁大膽?!小心我拎你留低果o的香腸扑濕你呀死茂利!
星期一
客人D o係1800先出現,完全唔理我感受.意圖催殘我.飢餓同殺人o既意欲輪流纏繞我.本來應該覆實o既資料搞到而家先攪.真係激到我彈起.不過佢最後因為不敵時差o既影響.暫停對我o既折磨.不過我要餓住個肚返屋企.返到屋企仲有好多o野做....
星期二
見澳洲客,好nice.我使盡全力令個氣氛輕鬆o的,久唔久攪o下笑.都令我幾享受.之後仲同佢o地出尖沙咀shopping.呃o左半日,不過要付代價.夜晚要開夜車.
星期三
今日冇客見,不過好多煩瑣o野要攪.所以都係唔得閒.返到屋企終於頂唔順.大人見我辛苦就建議我訓到0400起身開工.我覺得個idea唔錯所以照做....
星期四
本來預o左個客人D上o黎,點知甩底.又係做做做...突然知道爆o左鑊.心情極差!夜晚陪大人o的親戚食晚飯,送完佢o地返屋企之後買杯咖啡提o下神又做過.
星期五
一起身就嘔電!好辛苦,個人暈暈o地.因為今日仲係好多o野做同埋要去展覽會所以死頂.
返到公司處理隻鑊,工廠o的人令我扯火.終於都怒剷佢o地一鑊金o既.不過佢o地執返身彩,因為喪bi o係我前面.如果唔係.嘿嘿!佢o地實試到我獨門怒吼o既滋味!唔係我認叻,咁耐以o黎冇人受得起!我上次小小o既示範已經令人相當震撼.如果用十成功力,恐怕我會失聲...
今日中午成功屈o左老細T請食晏,去到展覽會就不停有人打電話俾我.係公司o既同事,好多人搵我,又要覆人.好煩!本來諗住去完展覽會就閃,點知都係唔得.終於都係同喪bi返公司,夜晚2000先走...
星期六
攪o左成個星期,真係頂唔順.小組完o左之後同成班弟兄姊妹一齊去打邊爐.成班人都係癲o既!哈哈!
星期日
因為實在陪得大人,大少小.所以要補返數.是日Family day!
其實星期五就覺得身體唔妥,不過冇計.死都要撐.唔係點攪呀?!
仲以為地獄一星期就咁完,點知收到通知我星期一要北上三日.所以繼續捱!
祝福所有又忙又病o既人!
