獨闖美利堅-4日

今朝一早起身就返早堂,完咗之後同班弟兄姊妹去食早餐.我同一個好耐冇見同傾計o既弟兄坐埋一齊.傾吓傾吓佢同我講咗一個好消息,我好凳佢高興!之後我就返屋企.

大人已經唔舒服咗一段時間,今日都仲未好.佢不停咁咳,仲咳得好大聲.佢成日覺得有舊嘢喺喉嚨度想咳出嚟,所以好用力咳,不過唔成功.

返到屋企就call個friend睇吓今晚幾點鐘見面,最初約咗9點.但後來因為時間關係所以再約過第二晚

我一直都好想為咗呢次美國之旅做好準備,但係我冇空間同辦法好好靜落嚟.我本來諗住返office,因為office冇人.但最後都打消呢個念頭.今日講道o既內容有o的迎合到我處境.(當人面對大件事o既時候應該要獨處同時亦應該要倒空自己去見神.咁樣就可以聽到神對自己講說話,知道神想自己點做.)我實在好想(好應該)咁做,不過有好大難度...

跟住我向神作咗個簡單o既禱告,然後我就喺張紙度寫,寫,寫...寫咗三頁.(不過我總係有o的唔滿意...)

我喺網上同個同事傾咗兩句,跟住有另一個同事加入,之後又多個,然後又多個...突然有個同事同我講,佢話去美國部機個控制台上次裝櫃嗰陣漏咗.而家要寄過去,要我話佢知個客o既地址...(?!!)
其實上次L小姐都有同我提個呢件事,不過已經係好耐o既事,點解仲未寄o既???嘩...我當時嬲到想打電話返廠鬧人!(同佢哋開年!!)我仲有4日就飛,你班友搞o的咁o既嘢?!!@#$%......

獨闖美利堅-5日

今日本來返半日,但係極之忙所以搞到夜晚7點先返屋企.

中午同老細去荃灣見客,之後食飯.然後再出尖嘴買禮物俾個客.跟住返公司幫老細攪申請美國簽證o的文件......咁就一日...

本來仲諗住揾個時間plan美國之旅過單工程點做,但返到屋企攰到死咁濟...

約咗個好朋友聽晚(21號)飲嘢.再唔見佢都唔知到幾時再見面lu...

獨闖美利堅-6日

知道老細噚晚喺公司過夜,所以特登早o的返公司.喺樓下茶記買咗個靚早餐就臨臨聲返上樓.入到門口發現o的燈開哂仲開埋冷氣(?!),跟住聽到佢間房傳出沙沙聲.我就敲門問佢食咗早餐未?佢話食咗,之後就派利是俾我.我又派返俾佢對仔女,跟住佢就俾錢我買機票同俾雜費.然後就出咗去.臨出門口仲叫我幫佢買架printer...(佢指定要canon葛文輝賣廣告嗰隻.)

中午食飯嗰陣發生咗件事,正當我同Frankie就嚟食完之際出現咗一班著類似護士制服o既女仔.佢哋喺門口等位,突然間其中一個開始鬧...幾時先有位呀?!咁x耐o架!!食完就好走啦!睇吓!嗰個男人差唔多50歲嗰個呀,食完都唔走.仲喺度陪住條女...真係唔x唔鬆化........我個心就鬧佢死港女!突然間覺得好好笑,因為我心諗班港女唔通唔食碗米線會死?等唔切咪走囉,喺度好似傻婆咁鬧鬧鬧...吹漲!我忍唔住笑出嚟,搞到Frankie望住我唔知點好,以為我笑佢...

食飽飯就去買printer,最初諗住喺豐澤買.但係個sales態度我唔係好鐘意所以我冇買到.最後去咗百老匯買,雖然個sales好似唔多識嘢咁但係好過豐澤好多.Frankie仲整鬼我,叫我睇嗰個我好唔鐘意o既歌星段片.(無謂開名啦,費事俾人炸我A/C)估唔到部機好鬼重!!拎到返公司之後隻手震咗好耐...

5點幾老細返嚟,同佢傾咗一陣.我問佢部printer想放邊,佢話放喺我個位.(咁我即係有新printer用?!正!!)佢今日又同我講我以後唔使成日上廠.要專心做好business同幫佢跟好o的project.開完會之後我俾電話個friend,佢知道我老細o既新安排之後同我講佢o既睇法.跟住我搞完o的手尾之後我就去好好食碗雲吞面然後返屋企...

聽朝仲要見客...

獨闖美利堅-7日

今日終於訂好機票,準備下個星期四(25/3/2010)出發.

今日同Ame,Frankie食中午飯,夜晚同Abby,Rita,Frankie,大人&大少一齊去近又食炸豬扒飯.
食完之後上13樓老地方飲杯嘢傾吓計.可惜大人身體不適所以冇飲嘢...

聽日老細返公司,仲有好多嘢要同佢跟...
星期一仲要北上添...

好忙呀......

激死,笑死

話說有日,我陪我個好朋友去配眼鏡.趁住等攞眼鏡o既時候我哋去咗醫肚,佢食飽要去廁所.我就係麵店等佢.本來都冇乜嘢發生,點知突然間聽到碰一聲!原來隔離枱有個女仔跌咗落地下,再睇真o的原來佢張木凳爛咗.跟住o的店員踴埋去,點知佢地唔係去扶個女仔而係去研究張凳點解會爛.(...)搞咗一陣潮州佬終於忍唔住出聲:你哋顧咗個人先啦!!o的店員呆咗幾秒鐘先同個女仔講:你冇事丫嘛??

事後我同個friend講返,兩條友笑到碌地.估唔到會發生o的咁o既事...


公廠搬新office,樓下搬上樓上.老細係香港宜家買咗o的燈上廠,搵咗個電工裝燈.點知條友都唔知攪乜,首先佢話睇唔明o的圖,之後又意圖用超能力穿過度玻璃門入office,然後問我幾十次o的燈點裝.我當場俾佢激到就嚟爆炸.我忍唔住問佢:究竟我係電工定你係電工?好喇!裝完喇,點知裝到鬼五馬六...真係想當場生劏佢...

正因為我搬咗新office,所以我要買o的文具.埋單嗰陣個小姐話我仲爭70蚊就可以攞9折咭.於是我揀咗本記事簿.(啱啱好70)個小姐用好風趣o既口吻同我講:呢本簿係70蚊,不過有折.打咗折68蚊,不過我當你夠70啦.(當時我覺得好似睇緊周星馳o的戲咁...)我同佢兩個笑到收唔到聲...

公司年夜飯

公司今年第一次喺酒店擺年夜飯...

我就俾人捉咗上台做司儀...

要讀稿,朗誦,仲要唱歌...

成晚一粒飯都冇落過肚,為o既係想大家玩得開開心心...

我同兩位好拍檔一齊做司儀,M先生,同L小姐...

雖然係一餐飯,但係都有唔少體會...

令我最深刻o既係...

有o的人鐘意威

有o的人發財唔立品

有o的人飲大兩杯攪攪震,智力衰退

乜嘢叫酒肉朋友,我今晚終於見識過

嚟緊仲有廠慶,好可能仲有下次...

怕怕........................................

P.S.:諗住俾架相機人幫我映多o的相,點知所托非人.

映咗好多冇用o既短片,又唔開閃光燈.

攪到o的相唔見得人........頂!