斯巴達式教育??

o尋晚放工拖住疲勞o既身軀返屋企,(感謝主!因為要返屋企做o既功課唔太多.)食完晚飯想話開工之前老竇提醒我大少未做功課.因為大人要揍住妹妹,所以我要負責教大少做功課.佢今o尋晚o既功課係畫波浪紋,老師之前已經教佢畫好一頁.另一頁要自己做.

開始o既時候仲好o地o地,但係未到一半波浪就變成火山.經過無數次循循善誘之後佢仍然仲係畫火山.於是......大家都應該知道發生咩事啦...

我都唔想咁o架,不過我唔發惡佢就會冇心機做功課.令我發惡o既原因唔係佢畫得唔靚.一個4歲o既細路仔,可以要求佢畫得靚成點呀?只不過佢唔俾心機就令我覺得要嚴加管教.所以語氣惡o的同嚴格o的我覺得係必須o既.

佢一邊含住眼淚做功課,我個心都流住眼淚去監佢做好o的功課.就係咁大少就完成份功課...

佢一完成功課就去同大人哭訴,大人好識做.安慰佢之餘仲同佢講道理.呢種一軟一硬
o既教育方式都係我o地兩公婆常用o既.而軟,硬o既角式都唔係固定o既...

之後大少出返o黎,同我講o左聲唔該爸爸.我個心當堂軟哂,俾o左個充滿溫情o既擁抱佢.仲同佢玩o左一陣.

今朝大少同大人講,爸爸o尋晚嚇死我lu...